Галоўная / Навiны / Навiны рэспублiкi
08.04.2021

Дэпутаты падтрымалі змяненні ў Кодэкс аб адукацыі

7 красавіка, Мінск /Кар. БЕЛТА/. Дэпутаты на пасяджэнні пятай сесіі Палаты прадстаўнікоў Нацыянальнага сходу Беларусі сёмага склікання прынялі ў першым чытанні законапраект "Аб змяненні Кодэкса Рэспублікі Беларусь аб адукацыі", перадае карэспандэнт БЕЛТА.

Падрыхтоўка новай рэдакцыі Кодэкса аб адукацыі абумоўлена змяненнем структуры вышэйшай адукацыі, уключэннем у сістэму адукацыі Беларусі навукова-арыентаванай адукацыі ўзамен сістэмы паслявузаўскай адукацыі, пашырэннем сферы прымянення мэтавай падрыхтоўкі спецыялістаў і рабочых (служачых) для задавальнення патрэбнасцей у спецыялістах рознага профілю арганізацый, размешчаных як у малых населеных пунктах і на забруджаных тэрыторыях, так і ў іншых населеных пунктах, а таксама ўстараненнем прабелаў, выяўленых у практыцы прымянення Кодэкса аб адукацыі.

Прапануецца ўстанавіць абавязковым атрыманне агульнай сярэдняй адукацыі, уводзяцца нормы, якія накіраваны на ўкараненне інклюзіўных падыходаў у адукацыі, забяспечваюць роўны доступ да атрымання адукацыі для ўсіх навучэнцаў з улікам іх індывідуальных патрэбнасцей і магчымасцей.

"Дакладна агаворана ў заканадаўстве, што бацькі і законныя прадстаўнікі дзяцей не маюць права ўмешвацца ў навучальны працэс. Па гэтых пытаннях, за інфармацыяй яны абавязаны будуць звяртацца непасрэдна ва ўстанову адукацыі, - адзначыў старшыня Пастаяннай камісіі па адукацыі, культуры і навуцы Ігар Марзалюк. - Прадпісана поўнае напісанне ўстаноў адукацыі з тыпам і відам. Аптымізуюцца розныя віды і тыпы ўстаноў адукацыі. Пры гэтым дакладна на заканадаўчым узроўні забаронена выкарыстоўваць розным грамадскім арганізацыям, фондам, якія не маюць ніякіх адносін да сістэмы адукацыі, такія паняцці, як школа, ліцэй, каледж, інстытут, універсітэт, акадэмія".

Працягласць навучальнага года, уключаючы канікулы, устанаўліваецца з 1 верасня па 31 жніўня. Прычым дзеці малодшага ўзросту будуць вучыцца з 1 верасня па 31 мая, а навучэнцы 9-х, 11-х (12-х) класаў з 25 мая будуць займацца падрыхтоўкай да экзаменаў і ЦТ.

Будуць аптымізаваны віды ўстаноў дашкольнай адукацыі: выключаны яслі, яслі-сад, санаторныя яслі-сад.

"Заўсёды перад 1 верасня ўзнікала праблема, у колькі гадоў ісці ў школу. Раней была строга прапісана норма - 6 гадоў і толькі з дазволу Міністэрства адукацыі іншае. Цяпер агаворана, што, як правіла, з 6 гадоў. Але разам з тым адзін з законных прадстаўнікоў можа з улікам шэрага акалічнасцей, у тым ліку і медыцынскіх, адправіць сваё дзіця пазней. З іншага боку, калі дзіця гатова, гэта пацвярджаюць медыцынскія даныя і бацькі хочуць яго адправіць у няпоўныя 6 гадоў, то таксама яны маюць на гэта права", - удакладніў парламентарый.

На ўзроўні прафесійна-тэхнічнай і сярэдняй спецыяльнай адукацыі будзе функцыянаваць адзіны від установы адукацыі - каледж. На ўзроўні вышэйшай адукацыі - тры віды: універсітэт, акадэмія, інстытут. Выключаюцца паняцці "класічны" і "профільны" адносна ўніверсітэта, выключаны як від вышэйшы каледж.

На ўзроўні вышэйшай адукацыі прадугледжваецца бакалаўрыят (4-4,5 года), магістратура (1-2 гады) і бесперапынная адукацыйная праграма (спецыяльная вышэйшая адукацыя 5-6 гадоў з дыпломам магістра для асобных тэхнічных спецыяльнасцей і вышэйшая адукацыя па спецыяльнасцях "ахова здароўя"). Паслявузаўская адукацыя пераймяноўваецца ва ўзровень навукова-арыентаванай адукацыі - аспірантура (ад'юнктура) з тэрмінам падрыхтоўкі не больш за тры гады.-0-