Галоўная / Навiны / Навiны рэспублiкi
01.10.2021

Лукашэнка трымае слова. Ці выканае цяпер умову CNN?

30 верасня, Мінск /Кар. БЕЛТА/. Прэзідэнт Беларусі Аляксандр Лукашэнка даў інтэрв'ю амерыканскай тэлекампаніі CNN, паведамляе БЕЛТА.

Аб магчымасці такога інтэрв'ю кіраўнік дзяржавы заявіў яшчэ 9 жніўня на сустрэчы з прадстаўнікамі грамадскасці, экспертнай супольнасці і медыя "Вялікая размова з Прэзідэнтам", дзе прысутнічала і прадстаўнік тэлекампаніі. Яна прапанавала Аляксандру Лукашэнку адказаць на пытанні тэлекампаніі.

"Я не выключаю гэтага. Пры адной умове: калі вы дасце ўсё, што я скажу, не купіруючы, не выразаючы, не дабаўляючы, - сказаў кіраўнік дзяржавы. - Вось на гэтых умовах дамоўцеся з прэс-сакратаром".

У якасці інтэрв'юера выступіў старшы міжнародны аглядальнік тэлеканала CNN у Расіі, кіраўнік карпункта Мэцью Чанс. Журналіст задаў пытанні, якія сталі ўжо традыцыйнымі для заходняй прэсы. У іх аснове - грубыя і адкрытыя фэйкі, большасць з якіх кіраўнік дзяржавы абвяргаў ужо не раз. Але былі і новыя, прычым зусім неверагодныя. Напрыклад, што мігрантам у Беларусі даюць наркотыкі.

Тым не менш, беларускі лідар максімальна адкрыта адказаў на ўсе пастаўленыя пытанні. Падрабязна расказаў аб міграцыйнай праблематыцы, назваўшы сапраўдныя прычыны і віноўнікаў сітуацыі, што склалася. Выказаўся пра няўдалых "рэвалюцыянераў", якія збеглі з Беларусі. Пракаменціраваў хлусню і нагнятанне вакол пасадкі ў мінскім аэрапорце самалёта Ryanair. Расказаў праўду аб падыходах краіны ў барацьбе з пандэміяй COVID-19. У інтэрв'ю таксама ўзнімалася тэматыка беларуска-расійскіх адносін.

Пасля завяршэння інтэрв'ю Мэцью Чанс падзяліўся ўражаннямі з прадстаўнікамі беларускіх СМІ. Даволі нечакана прагучаў адказ на пытанне, ці будзе выканана папярэдняя ўмова аб поўнай публікацыі зместу размовы. "Мы ў CNN​ не прымаем ніякіх абмежаванняў наконт таго, як выкарыстоўваць матэрыялы інтэрв'ю, і будзем выкарыстоўваць гэту здымку так, як палічым патрэбным", - заявіў журналіст.

Пры гэтым, як стала вядома БЕЛТА, на стадыі ўзгаднення размова ішла менавіта аб тым, каб у інтэрнэце на сайце CNN​ інтэрв'ю было размешчана без выключэнняў, а ў эфіры тэлеканала былі таксама паказаны некалькі паўнацэнных частак размовы. "Гэтыя пытанні былі імі пацверджаны. Яны далі сваю згоду", - расказаў адзін з удзельнікаў працэсу падрыхтоўкі інтэрв'ю.

Зрэшты, канчаткова па гэтым пытанні можна будзе меркаваць пасля выхаду ў эфір матэрыялаў інтэрв'ю. Гэта абяцаюць зрабіць у бліжэйшыя дні.

Тэлекампанія CNN​ створана ў 1980 годзе медыя-магнатам Тэдам Цернерам. Яна мае больш за 35 замежных бюро і вяшчае на шасці мовах. Патэнцыяльная аўдыторыя CNN​ складае больш як 200 млн тэлегледачоў. У цэлым жа навіны кампаніі даступныя да прагляду ў больш як 200 краінах і тэрыторыях свету.